मुल पूर्खा : रणमा खाँ - एक जानकारी

रणमा खाँ — गैयाँ बबा

थौर जाईत अन्तर्गत बहुत किसिमके आपन आपन पहैत या थाकवशं छै । प्रस्तुत बंशावलीमे 'रणमा खाँ' बंशके बंशावली उल्लेख क्याल गेल छै । अग्रज रणमा खाँ के बुढ पुरान सबके कहब अनुसार रणमा खाँ के जनम अखुनका सप्तरी जिल्लाके अकवरपुर भगवतपुर गाममे भेल रहै । तै समयमे थौर सबके किरब किरब सैब घरमे बहुत संख्यामे गाय, भैस रहै । उ सब गाय भैस चरबैले बोनजङ्गलमे, टप्पुमे जाइतरहै । जै ठाम अस्थायी बसोबास क्याके बहुत संख्यामे गाय भैस चरावै या राखै जकरा 'बथान' कहैछेलै । 'रणमा खाँ' या ओकर यार(वगैरीया) 'जसमत खाँ' दुनु गोरे संगे संग गाय भैस चरावैत रहै । यी दुनु गोरेके बथान अखुनका सप्तरी जिल्लाके बैरयाही (शम्भूनाथ न.पा. वार्ड नं. ८) गाम क्षेत्रमे रहै । तखुन त घनघोर) बोन जङ्गल रहै, जै मे बाघ, भौल, गोडी जखा हिंसक जङ्गली जानवरसब बहौत संख्यामे रहै । रणमा खाँ बहौत बलगार साहसी या निडर मरद छेलै तहै से ओहेन बोन जङ्गलमे आपन यार संगे गाय भैस बथान राईखके चरावैत रहै । सब दिन गाय भैस चरावैके कारणसे रणमा खाँ के सखासन्तान सब ओकरा 'गैयाँ बबा' कहैछै ।

बथान के क्रममे एक दिन गैयाँ बबा ओई जङ्गलमे हन्यागेलै अर्थात उ विल्यागेलै ओकर गाय भैस अनेरे भोइर दिन चैरके बथानमे अलै । ओकर यार जसमत खाँ ओकरा ताके लागलै, सैबके खबर कैल्कै । महादेव(रणमा खाँ बबाके बाबु)/सहादेव(रणमा खाँ बबाके कका) संगे सबकोय मिलके बैरके घनघोर बोनमे ढावे कुशे, काँटे कुशे, फारेपाते जते तैक सकलकै ओतै तैक ताकलकै मगर उ कतौ नै भेटलै । अन्तमे गैयाँ बबाके बरका लाठी, खरम, जमा, गम्छा, चिमटा, बटुवा, चिलम खैनी एकटा गाछी तरमे भेटलै लेकिन बबा नै भेटलै । ओकर गाय भैस सोहो धियापुता सब आपन आपन घर ल्या गेलै । बबा बिलेलाके किछेक दिनके बादमे बोनजंगल जायवला बाट बटोहीसब, ओइ कातकुतके और और लोक सब बबाके लाठी खरम भेटलाहा गाछीके कातकुतमे गुँहमुत, धिनाह करे लाग्लै तहै समयमे बैरयाही जङ्गल क्षेत्रमे दिने दिने बगहौर(बाघके प्रकोप) हेवे लाग्लै । बघहौरमे सब दिन ककरो ने ककरो गाय, भैस, बकसी बाघ ख्याजाय/ल्याजाय, ओइ कातकुतके लोक घर से निकले नै सकै, बहौत बरका प्रकोप भ्यागेलै । ताब ओहै गामके लोक रणमा खाँ बबाके सुमरण कैलकै तब बबा देवताके रुपमे ओकर शिरमे 'स्याहा' भेलै या बगहौरके कारण या निदान बताइलकै संगे संग उ आपन पुजा माँगलकै या ताब लोक सब पुजा देलकै या वगहौर हैंट गेलै । तहै दिनसे बैरियाही क्षेत्रके लोक सब ओकरा बिरसे बिरस पुजा देवे लागलै । ओइ दिन से आई तैक वई कातकुतमे ककरो घरमे दु:ख विपैत परैछै या कोनो गाममे, यै गलगि वगहौर, हैजा, फौती नै हेवे से कैहके रणमा खाँ बबाके सुमरन करैछै या दु:ख विपैतके निदान करै छै ।

रणमा खाँ के बंशज

रणमा खाँ के बंशज धियापुता सब सप्तरी जिल्लाके डङ्गराही, कचनदाहा, बेङ्री, प्रमाणपुर, लक्षणपट्टी, कनकपुर, बलुवा, फुलहरा, कुशाहा, बकसाहा मे तैहने सिरहा जिल्लाके सिसौनी, बर्छबारमे, मोरङ सुनसरी जिल्लाके मधेशाभौरा, बकलौरी, लालपुरभोरा या उदयपुर जिल्लाके बेलहा गाम सबमे बसोबास करैछै ।